नाशिक, (प्रतिनिधी) १० जुलै - शहरातील उच्चभ्रू आणि गजबजलेल्या पंडित कॉलनी परिसरात गुरुवारी (दि. ९) हातात उघडा कोयता घेऊन एका तरुणाने भरदिवसा धुमाकूळ घातल्याची धक्कादायक घटना समोर आली आहे. भररस्त्यात एका तरुणावर कोयत्याने वार करण्याचा प्रयत्न या हल्लेखोराने केला, मात्र सुदैवाने तो तरुण बालंबाल बचावला. या थरारक घटनेचा व्हिडीओ सोशल मीडियावर प्रचंड व्हायरल झाल्यानंतर पोलीस यंत्रणा खडबडून जागी झाली असून संशयिताचा शोध सुरू केला आहे.
प्रसंगावधानामुळे अनर्थ टळला
मिळालेल्या माहितीनुसार, पंडित कॉलनीतील आनंदा लॉन्ड्री भागात एक तरुण उभा होता. त्याच वेळी हातात धारदार कोयता घेऊन एक माथेफिरू तरुण तिथे आला. त्याने काही समजण्याच्या आत उभा असलेल्या तरुणावर थेट कोयता उगारून वार करण्याचा प्रयत्न केला. मात्र, पीडित तरुणाने कमालीचे प्रसंगावधान राखत जवळच असलेल्या एका अर्धवट बांधलेल्या भिंतीवरून पलीकडे उडी मारली. यामुळे त्याचा जीव थोडक्यात वाचला.
दुचाकीवरून हल्लेखोर पसार
हल्ला करण्याचा प्रयत्न अयशस्वी झाल्यानंतर संशयित हल्लेखोर तिथून पळाला आणि रस्त्यावर दबा धरून बसलेल्या आपल्या साथीदाराच्या दुचाकीवर (डबल सीट) बसून राजीव गांधी भवनाच्या दिशेने सुसाट वेगाने पसार झाला. हा सर्व प्रकार वर्दळीच्या ठिकाणी घडल्याने आणि रात्री त्याचा व्हिडीओ सोशल मीडियावर व्हायरल झाल्याने शहरात खळबळ उडाली आहे.
कायदा अन् सुव्यवस्थेचा प्रश्न ऐरणीवर
भरदिवसा मुख्य रस्त्यावर शस्त्रांचा असा खुलेआम वापर होत असल्याने नाशिकमधील कायदा व सुव्यवस्थेचा प्रश्न पुन्हा एकदा ऐरणीवर आला आहे. या घटनेमुळे स्थानिक नागरिक आणि व्यापाऱ्यांमध्ये भीतीचे वातावरण निर्माण झाले आहे. नागरिकांनी अशा गुंडप्रवृत्तीच्या लोकांवर कठोर कारवाई करण्याची मागणी केली आहे.
पोलिसांकडून तपास सुरू
या घटनेची माहिती मिळताच सरकारवाडा पोलीस ठाण्याच्या पथकाने तातडीने घटनास्थळी धाव घेतली. पोलिसांनी परिसरातील सीसीटीव्ही फुटेज ताब्यात घेतले असून, त्या आधारे संशयित हल्लेखोर आणि त्याच्या साथीदाराची ओळख पटवण्याचे काम युद्धपातळीवर सुरू आहे.
