नाशिक, (प्रतिनिधी) १० जुलै - नाशिक जिल्ह्यात अपघातांचे सत्र थांबण्याचे नाव घेत नाहीये. गेल्या काही दिवसांत वेगवेगळ्या ठिकाणी झालेल्या तीन भीषण अपघातांमध्ये तीन मोटारसायकलस्वारांना आपला जीव गमवावा लागला आहे, तर एका अपघातात महिला गंभीर जखमी झाली आहे. याप्रकरणी मालेगाव तालुका, पेठ आणि दिंडोरी पोलीस ठाण्यात गुन्हे दाखल करण्यात आले आहेत.
१) मालेगाव तालुका: दुचाकी घसरून ३२ वर्षीय तरुणाचा अंत
मालेगाव तालुक्यातील पाटणे येथील गौरव दिलीप खैरणार (वय ३२) हा तरुण गेल्या शुक्रवारी (३ जुलै) परिसरातील वाके गावात गेला होता. सायंकाळच्या सुमारास तो आपल्या (एमएच ४१ पी ०३४६) दुचाकीने घराकडे परतत असताना, वाके शिवारात त्याची भरधाव दुचाकी अचानक घसरली. या भीषण अपघातात गौरव गंभीर जखमी झाला आणि उपचारादरम्यान त्याचा मृत्यू झाला. याप्रकरणी सागर खैरणार यांनी दिलेल्या फिर्यादीवरून मालेगाव तालुका पोलीस ठाण्यात गुन्हा दाखल करण्यात आला असून पोलीस नाईक देवरे पुढील तपास करत आहेत.
२) पेठ महामार्ग: गुजरातच्या 'छोटा हत्ती'ने दुचाकीला उडवले; २८ वर्षीय तरुण ठार
दुसरा अपघात बलसाड ते नाशिक राष्ट्रीय महामार्गावर झाला. पेठ तालुक्यातील कुंभाळे येथील राजेंद्र प्रभाकर दळवी (वय २८) हा युवक रविवारी (५ जुलै) दुपारी आपल्या (एमएच १५ केएफ ८२६८) दुचाकीने पेठ येथून कुंभाळेकडे जात होता. महामार्गावरील एका गॅरेजसमोर बलसाडकडून नाशिकच्या दिशेने भरधाव जाणाऱ्या (जीजे ०९ एयू ३५१५) क्रमांकाच्या 'छोटा हत्ती' वाहनाने त्याच्या दुचाकीला जोरदार धडक दिली. या अपघातात राजेंद्रचा जागीच मृत्यू झाला. फिर्यादी प्रभाकर दळवी यांच्या तक्रारीवरून पेठ पोलिसांनी कारचालक विक्रमसिंह जोरावरसिंह रहेवर (रा. साबरकांठा, गुजरात) याच्याविरोधात गुन्हा दाखल केला असून जमादार डी. डी. जाधव तपास करत आहेत.
३) दिंडोरी रोड: रॉंग साईडने आलेल्या टेम्पोची धडक; पतीचा मृत्यू, पत्नी गंभीर
तिसरा अपघात दिंडोरी रस्त्यावरील तळेगाव शिवारात मंगळवारी (७ जुलै) सायंकाळी घडला. दिलीप रामदास भोये हे आपल्या पत्नी रंजना भोये यांच्यासह (एमएच १५ जीक्यू २०१९) दुचाकीवरून नाशिककडून दिंडोरीच्या दिशेने जात होते. तळेगाव शिवारात समोरून रॉंग साईडने (विरुद्ध दिशेने) भरधाव आलेल्या (एमएच १५ जे डब्ल्यू ७१०६) इंट्रा टेम्पोने त्यांच्या दुचाकीला समोरासमोर धडक दिली. या अपघातात दिलीप भोये यांचा दुर्दैवी मृत्यू झाला, तर त्यांची पत्नी रंजना या गंभीर जखमी असून त्यांच्यावर रुग्णालयात उपचार सुरू आहेत. मारुती भोये यांच्या फिर्यादीवरून दिंडोरी पोलिसांनी टेम्पो चालकावर गुन्हा दाखल केला असून हवालदार सोनवणे तपास करत आहेत.
