नाशिक, (प्रतिनिधी) १ जुलै - शहरात एक अत्यंत हृदयद्रावक आणि दुर्दैवी घटना समोर आली आहे. दिपालीनगर भागातील एका बांधकाम साईटवर खेळत असताना पाण्याच्या टाकीत पाय घसरून पडल्याने दोन वर्षांच्या चिमुरडीचा बुडून मृत्यू झाला. ही घटना मंगळवारी (३० जून) दुपारच्या सुमारास घडली. याप्रकरणी मुंबईनाका पोलीस ठाण्यात आकस्मिक मृत्यूची नोंद करण्यात आली आहे. खुशी संदीप वानखेडे (वय २ वर्ष, रा. गणपती मंदिराजवळ, दिपालीनगर, नाशिक) असे मृत पावलेल्या निष्पाप बालिकेचे नाव आहे.
खेळता खेळता झाला घात
पोलीस सूत्रांनी दिलेल्या माहितीनुसार, वानखेडे कुटुंब दिपालीनगर येथील गणपती मंदिर परिसरात सुरू असलेल्या एका बांधकाम साईटवरच वास्तव्यास आहे. हे कुटुंब तिथे दिवसभर मजुरीचे काम करते आणि रात्रीच्या वेळी सुरक्षा रक्षक (वॉचमन) म्हणूनही काम पाहते. मंगळवारी दुपारच्या सुमारास खुशीचे आई-वडील नेहमीप्रमाणे बांधकाम साईटवर आपल्या कामात व्यस्त होते. दरम्यान, दोन वर्षांची चिमुरडी खुशी तिथेच अवतीभवती खेळत होती.
मजुरांनी काढले बाहेर, पण...
खेळत खेळत खुशी बांधकाम साईटवर असलेल्या पाण्याच्या उघड्या टाकीजवळ गेली. तिथे खेळत असताना अचानक तिचा पाय घसरला आणि ती थेट पाण्याच्या टाकीत पडली. काही वेळाने ही बाब कुटुंबियांच्या आणि इतर मजुरांच्या निदर्शनास आली. त्यांनी तातडीने पाण्याच्या टाकीकडे धाव घेत खुशीला बाहेर काढले. मात्र, तोपर्यंत तिच्या पोटात पाणी गेल्याने ती बेशुद्ध झाली होती.
तिला अत्यंत गंभीर आणि बेशुद्ध अवस्थेत कुटुंबीयांनी इतर मजुरांच्या मदतीने तत्काळ जिल्हा रुग्णालयात उपचारासाठी दाखल केले. मात्र, दुर्दैवाने रुग्णालयातील वैद्यकीय सूत्रांनी तिला तपासून उपचारापूर्वीच मृत घोषित केले.
दोन वर्षांच्या हसत्या-खेळत्या चिमुरडीचा असा अचानक डोळ्यादेखत अंत झाल्याने वानखेडे कुटुंबावर दुःखाचा डोंगर कोसळला असून, संपूर्ण परिसरात मोठी हळहळ व्यक्त केली जात आहे.
बांधकाम व्यावसायिक आणि पालकांनो सावधान!
बांधकाम साईटवर असणाऱ्या पाण्याच्या टाक्या, सेफ्टी टँक किंवा मोठे खड्डे नेहमी सुरक्षितपणे झाकलेले असणे गरजेचे आहे. कामाच्या गडबडीत मजुरांची लहान मुले खेळताना अशा ठिकाणी जाण्याची दाट शक्यता असते. त्यामुळे अशा दुर्घटना टाळण्यासाठी टाक्यांवर मजबूत झाकण किंवा बॅरिकेडिंग करणे बंधनकारक करावे, जेणेकरून कोणत्याही निष्पाप जीवाचा बळी जाणार नाही.
