कळवण, (प्रतिनिधी) २७ जून - कळवण शहरात राजरोसपणे सुरू असलेल्या आंतरराज्यीय ऑनलाइन बेटिंग (सट्टा जुगार) रॅकेटचा नाशिक शहर सायबर पोलिसांनी मोठ्या चाणाक्षपणे भांडाफोड केला आहे. 'सुतावरून स्वर्ग गाठत' सायबर पोलिसांनी कळवणमधील एका अड्ड्यावर छापा टाकून गुजरातच्या एका युवकासह एकूण पाच जणांना रंगेहात अटक केली. या कारवाईत विविध बँकांची ५४ पासबुके, २५ एटीएम कार्ड्स, २६ सिमकार्ड्स आणि इलेक्ट्रॉनिक्स गॅजेट्स असा मोठा मुद्देमाल जप्त करण्यात आला आहे. पोलीस आयुक्त संदीप कर्णिक यांनी सायबर गुन्ह्यांवर करडी नजर ठेवण्याचे आदेश दिले आहेत. त्यानुसार 'फेक कॉल सेंटर' आणि ऑनलाइन बेटिंगवर लक्ष ठेवत असताना ही मोठी कारवाई करण्यात आली.
असे अडकले संशयित पोलिसांच्या जाळ्यात
देवळाली कॅम्प भागात राहणाऱ्या अरबाज शेख या संशयिताने ऑनलाइन बेटिंगचा व्यवसाय सुरू केल्याची माहिती सायबर पोलिसांना मिळाली होती. पोलीस त्याच्या मागावर असतानाच, सायबरचे अंमलदार भूषण देशमुख आणि दर्शन सोनवणे यांना खात्रीशीर गोपनीय माहिती मिळाली की, हे संशयित कळवण येथील 'गंगा निवास' या ठिकाणी हा जुगार अड्डा चालवत आहेत.
मिळालेल्या माहितीच्या आधारे सायबर पथकाने गुरुवारी (दि. २५) दुपारच्या सुमारास कळवण शहरात धाड टाकली. या ठिकाणी संशयित हे 'रेड्डी ४१० ब्रांच', 'क्रिकबेट ९९', '११ एक्स' व 'प्ले कॅशिओ' या वेबसाईटद्वारे ग्राहकांचे डिपॉझिट व विड्रॉवल करून ऑनलाइन जुगार चालवताना रंगेहात पकडले गेले.
अटक करण्यात आलेले संशयित:
१. अरबाज शब्बीर शेख (वय २७, रा. ब्राह्मणगल्ली, वडनेर दुमाला, देवळाली कॅम्प)
२. आसिफ जाफर हुसेन (वय ४२, रा. बाजारतळ, लासलगाव, ता. निफाड)
३. पठाण अरबाज शान फरद खान (वय २३, रा. हसननगर, साबरकंठा, गुजरात)
४. पंकज नामदेव आहेर (वय ३४, रा. शिवराजनगर, वडनेर गेट, पाथर्डी रोड, नाशिक)
५. सागर रमेश कांबळे (वय ३८, रा. बौद्धवाडी, वारूळ, कोल्हापूर)
मोठा मुद्देमाल जप्त आणि सीलबंद
पोलिसांनी घटनास्थळावरून गुन्ह्यात वापरले जाणारे साहित्य जप्त केले आहे. यामध्ये:
मोबाईल: २२ हँडसेट (४ आणि १८ चा संच)
इंटरनेट राऊटर: ३ नग
बँक साहित्य: ५४ पासबुके आणि धनादेश पुस्तके (चेकबुक)
एटीएम कार्ड्स: २५ नग
सिमकार्ड्स: २६ नग
हिशोबाच्या वह्या: ४ नोटबुक
रॅकेटचे 'आंतरराज्यीय' कनेक्शन!
अटक करण्यात आलेल्या संशयितांमध्ये गुजरात राज्यातील साबरकंठा येथील एका युवकाचा समावेश असल्याने या रॅकेटचे धागेदोरे आंतरराज्यीय पातळीवर पसरल्याचे स्पष्ट झाले आहे. या माध्यमातून दररोज लाखो रुपयांची उलाढाल होत असल्याचा प्राथमिक अंदाज असून, सट्ट्याचे पैसे कोणत्या बँक खात्यांवरून कुठे वळवले जात होते, याचा तपास पोलीस करत आहेत.
नव्या कडक कायद्यानुसार गुन्हा दाखल
याप्रकरणी शहर सायबर पोलीस ठाण्यात भारतीय न्याय संहिता (BNS) कलम ३१८(४), ३(५), नवीन ऑनलाइन गेमिंग प्रचार आणि नियमन कायदा २०२५ चे कलम ५, ६, ७, ९ सह माहिती तंत्रज्ञान अधिनियम (IT Act) २००० चे कलम ६६ (क), ६६ (ड) नुसार गुन्हा दाखल करण्यात आला आहे.
सायबर पोलिसांचे आवाहन:
"ऑनलाइन बेटिंग हा अत्यंत गंभीर गुन्हा आहे. अनेक तरुण या झटपट पैशांच्या आमिषाला बळी पडून आपले आयुष्य उद्ध्वस्त करून घेतात. नागरिकांना कुठेही अशी संशयास्पद लिंक, अॅप किंवा माहिती मिळाल्यास तत्काळ १९३० या सायबर हेल्पलाईनवर संपर्क साधावा."
कारवाई करणारे पथक:
ही धडक कारवाई पोलीस आयुक्त संदीप कर्णिक, उपायुक्त किरणकुमार चव्हाण व सहाय्यक आयुक्त संदीप मिटके यांच्या मार्गदर्शनाखाली वरिष्ठ पोलीस निरीक्षक संजय पिसे, सहाय्यक निरीक्षक धिरज गवारे, अंमलदार साहिल सैय्यद, दर्शन सोनवणे, भूषण देशमुख, गिरीष ठाकूर, कल्पेश पाटील, विकास पाटील आदींच्या पथकाने यशस्वीरीत्या पार पाडली.
