नाशिक, (प्रतिनिधी) २५ जून - नाशिक जिल्ह्यात आत्महत्येचे सत्र सुरूच असून सोमवारी (दि. २२) वेगवेगळ्या भागात राहणाऱ्या एका विवाहितेसह तिघांनी गळफास लावून घेत आपले जीवन संपवले. या तिन्ही घटनांमधील आत्महत्येचे नेमके कारण अद्याप समजू शकलेले नाही. या प्रकरणी सिन्नर, पिंपळगाव बसवंत आणि सटाणा पोलीस ठाण्यात अकस्मात मृत्यूच्या नोंदी करण्यात आल्या आहेत.
१. सिन्नरमध्ये २७ वर्षीय विवाहितेची आत्महत्या
पहिली घटना सिन्नर शहरातील डुबेरे नाका परिसरात घडली. येथील माधवबाग, वेदांत पॅराडाईज अपार्टमेंटमध्ये राहणाऱ्या पूजा अनुराम गोडे (वय २७) या विवाहितेने सोमवारी सकाळी अज्ञात कारणातून आपल्या राहत्या घरातील छताच्या पंख्याला ओढणी बांधून गळफास लावून घेतला. हा प्रकार निदर्शनास येताच कुटुंबीयांनी तिला तातडीने सिन्नर येथील ग्रामीण रुग्णालयात दाखल केले. मात्र, डॉक्टरांनी तपासून तिला मृत घोषित केले. याबाबत अनिल मधुकर डगळे यांनी दिलेल्या खबरीवरून सिन्नर पोलीस ठाण्यात मृत्यूची नोंद करण्यात आली असून पोलीस उपनिरीक्षक राऊत पुढील तपास करीत आहेत.
२. पिंपळगाव बसवंत येथे तरुणाचा गळफास
दुसरी घटना निफाड तालुक्यातील पिंपळगाव बसवंत येथील इंदिरानगर भागात घडली. आनंदा बाळू सोनवणे (वय ३५) यांनी सोमवारी सकाळी अज्ञात कारणातून आपल्या राहत्या घरात पत्र्याच्या छताच्या अँगलला साडी बांधून गळफास लावून घेतला. कुटुंबीयांनी त्यांना तातडीने उपचारासाठी लासलगाव येथील ग्रामीण रुग्णालयात दाखल केले. मात्र, उपचारापूर्वीच वैद्यकीय सूत्रांनी त्यांना मृत घोषित केले. याबाबत किशोर माळी यांनी दिलेल्या खबरीवरून पिंपळगाव बसवंत पोलिसांनी अकस्मात मृत्यूची नोंद केली असून उपनिरीक्षक पवार तपास करीत आहेत.
३. डांगसौंदाणे येथे युवकाची जीवनयात्रा संपली
तिसरी घटना सटाणा तालुक्यातील डांगसौंदाणे येथे घडली. अनिल उर्फ अण्णा विजयदास बैरागी (वय ३५, रा. बुंधाटे, ता. सटाणा) या युवकाने सोमवारी दुपारच्या सुमारास आपल्या राहत्या घरात लोखंडी अँगलला दोरी बांधून गळफास लावून घेतला. यात त्याचा जागीच मृत्यू झाला. त्याच्याही आत्महत्येचे कारण समजू शकलेले नाही. याबाबत शिवाजी बैरागी यांनी दिलेल्या खबरीवरून सटाणा पोलीस ठाण्यात मृत्यूची नोंद करण्यात आली असून पोलीस हवालदार भोये पुढील तपास करीत आहेत.
