मुंबई, (प्रतिनिधी) १५ जून - वाढत्या डिझेल दरांमुळे आर्थिक अडचणीच्या गर्तेत सापडलेल्या राज्य परिवहन (एसटी) महामंडळाने सर्वसामान्य प्रवाशांना पुन्हा एकदा मोठा झटका दिला आहे. उन्हाळी हंगामासाठी लागू करण्यात आलेली १० टक्के हंगामी भाडेवाढ आता आणखी एक महिना वाढवण्याचा निर्णय प्रशासनाने घेतला आहे. त्यामुळे हे वाढीव भाडेदर आता १५ जुलै २०२६ च्या मध्यरात्रीपर्यंत लागू राहणार आहेत. उन्हाळी सुट्ट्यांची गर्दी लक्षात घेऊन महसूलवाढीसाठी १५ एप्रिलपासून ही भाडेवाढ लागू करण्यात आली होती. तिची मुदत आज (१५ जून) संपणार होती, मात्र महामंडळाचा वाढता आर्थिक ताण लक्षात घेता ती कायम ठेवण्यात आली आहे. या निर्णयामुळे ग्रामीण आणि मध्यमवर्गीय प्रवाशांच्या खिशाला मोठी कात्री लागणार आहे.
मुदतवाढीमुळे साधी (लालपरी) आणि मिडी बससेवांसाठीचे दर खालीलप्रमाणे कायम राहतील:
किमान भाडे (प्रौढ): १४ रुपये
किमान भाडे (मुले): ७ रुपये
प्रति टप्पा दर: ११.०५ रुपये ते १२ रुपये (मार्ग आणि मागणीनुसार)
पासेस आणि सवलतींना दिलासा!
या भाडेवाढीतून मासिक, त्रैमासिक तसेच विद्यार्थी पासधारकांना पूर्णपणे वगळण्यात आले आहे. तसेच शासनाच्या वतीने देण्यात येणाऱ्या इतर सामाजिक सवलतींमध्ये कोणताही बदल करण्यात आलेला नाही.
डिझेलच्या महागाईचा मोठा फटका
एसटी महामंडळाला दररोज सुमारे १०.८७ लाख लिटर डिझेल लागते. सध्या राज्यातील डिझेलचा दर प्रति लिटर ९७.८३ ते ९९.५० रुपयांच्या दरम्यान आहे. डिझेलच्या या वाढत्या किमतींमुळे महामंडळाला दररोज ३३ लाख रुपयांहून अधिक अतिरिक्त खर्च सोसावा लागत आहे. हा आर्थिक भार महिन्याला १० कोटी रुपये, तर वर्षभरात तब्बल १२४ कोटी रुपयांपर्यंत पोहोचण्याचा अंदाज आहे.
एप्रिलमध्येच ७६ कोटींचा तोटा!
इंधन खर्च आणि महसूल यातील तफावत कमालीची वाढल्याने एसटी महामंडळ प्रचंड आर्थिक संकटात सापडले आहे. केवळ एकट्या एप्रिल २०२६ या एकाच महिन्यात महामंडळाला सुमारे ७६ कोटी रुपयांचा मोठा तोटा सहन करावा लागला आहे. त्यातच कर्मचाऱ्यांच्या महागाई भत्त्यात झालेली वाढ यामुळे प्रशासनाकडे भाडेवाढ कायम ठेवण्याशिवाय दुसरा पर्याय उरला नसल्याचे सूत्रांनी सांगितले.
लाखो प्रवाशांचे हक्काचे वाहन असलेल्या एसटीच्या या निर्णयामुळे प्रवाशांमधून तीव्र नाराजी व्यक्त होत असून, प्रवासी संघटनांकडून आंदोलनाचा पवित्रा घेतला जाण्याची शक्यता वर्तवली जात आहे.
