नाशिक, (प्रतिनिधी) ९ जून - स्वतःच्या हक्काच्या जमिनीवर सुंदर घर उभारण्याचे स्वप्न पाहणाऱ्या नाशिककरांसाठी क्रेडाई नाशिक मेट्रोतर्फे एक अत्यंत सुवर्णसंधी उपलब्ध करून दिली जात आहे. नाशिक शहर आणि परिसरातील विविध ठिकाणच्या नामांकित प्लॉट प्रकल्पांची माहिती एकाच ठिकाणी मिळावी, या उद्देशाने क्रेडाईतर्फे पहिल्यांदाच 'प्लॉट एक्स्पो'चे आयोजन करण्यात आले आहे. येत्या १३ व १४ जून २०२६ रोजी गोविंद नगर येथील मनोहर गार्डन (हॉटेल ट्रीट शेजारी) येथे हा एक्स्पो रंगणार असल्याची माहिती क्रेडाई नाशिक मेट्रोचे अध्यक्ष गौरव ठक्कर यांनी पत्रकार परिषदेत दिली.
नाशिक विकासाच्या हायवेवर; गुंतवणुकीची उत्तम वेळ!
पत्रकार परिषदेत बोलताना अध्यक्ष गौरव ठक्कर म्हणाले, "नाशिक शहर सध्या विकासाच्या अत्यंत महत्त्वाच्या टप्प्यावर उभे आहे. वेगाने विकसित होणारी पायाभूत सुविधा, औद्योगिक वाढ, सुधारलेली कनेक्टिव्हिटी आणि गुंतवणूकदारांचा वाढता विश्वास यामुळे नाशिक हे गुंतवणुकीचे मुख्य केंद्र बनले आहे. प्लॉट म्हणजे केवळ जमीन नसून भविष्यातील स्वप्नांचा पाया आहे."
१० लाखांपासून बजेट प्लॉट्स; विविध प्रकारच्या पर्यायांची रेलचेल
एक्स्पोचे समन्वयक भूषण कोठावदे यांनी सांगितले की, क्रेडाई ही ग्राहकांसाठी विश्वासार्हतेचे प्रतीक आहे. ग्राहकांना फसवणूकमुक्त, कायदेशीररीत्या सुव्यवस्थित आणि पारदर्शक व्यासपीठ मिळवून देणे हा या एक्स्पोचा मुख्य हेतू आहे.
एक्स्पोची प्रमुख वैशिष्ट्ये:
किंमत: अवघ्या १० लाख रुपयांपासून पुढे प्लॉट्सचे विविध पर्याय उपलब्ध.
प्लॉटचे प्रकार: निवासी (Residential), औद्योगिक (Industrial), व्यावसायिक (Commercial), फार्म हाऊस (Farmhouse) आणि व्हिला प्लॉट्स (Villa Plots).
नाशिकसह 'या' सर्व परिसरातील प्लॉट्स एकाच छताखाली:
सहसमन्वयक श्याम साबळे यांनी दिलेल्या माहितीनुसार, या प्रदर्शनात नाशिक शहरासह उपनगरे आणि परिसरातील खालील भागांमधील प्लॉट्सचे शेकडो पर्याय उपलब्ध असतील:
चांदशी, मखमलाबाद, म्हसरूळ, आडगाव, नांदूर नाका, औरंगाबाद रोड.
पाथर्डी, इंदिरानगर, वडनेर, नाशिक रोड.
त्र्यंबक, घोटी, इगतपुरी आणि ओझर परिसर.
बँक लोनचेही मार्गदर्शन: प्लॉट खरेदी करणे तसेच त्यावर घर बांधण्यासाठी लागणाऱ्या अर्थसाहाय्यासाठी (बँक लोन) विविध वित्तीय संस्थांचे प्रतिनिधी येथे मार्गदर्शन करणार आहेत.
प्रदर्शनाची वेळ आणि नियोजन
क्रेडाई नाशिक मेट्रोचे मानद सचिव तुषार संकलेचा आणि एक्स्पो कमिटी प्रमुख मनोज खिवसरा यांनी सांगितले की, प्रदर्शनाची वेळ सकाळी १० ते रात्री ८:३० अशी असणार आहे. नाशिकच्या नियोजित वाढीचा आणि भविष्यकालीन संधींचा वेध घेण्यासाठी हा एक्स्पो नागरिकांसाठी महत्त्वपूर्ण ठरेल.
हा एक्स्पो यशस्वी करण्यासाठी क्रेडाई नाशिक मेट्रोची संपूर्ण टीम (ज्यामध्ये कृणाल पाटील, अनिल आहेर, अंजन भालोदिया, उदय घुगे, श्रेणिक सुराणा, सचिन बागड यांच्यासह अनेक समिती सदस्य व युवा विंगचे पदाधिकारी) विशेष परिश्रम घेत आहेत. नाशिककरांनी या भव्य प्रदर्शनाचा जास्तीत जास्त लाभ घ्यावा, असे आवाहन क्रेडाईतर्फे करण्यात आले आहे.
