नाशिक, (प्रतिनिधी) ८ जून - राज्यातील विधान परिषद निवडणुकीची रणधुमाळी शिगेला पोहोचलेली असताना, नाशिक स्थानिक स्वराज्य संस्था मतदारसंघात महायुतीसमोरील अडचणी कमालीच्या वाढल्या आहेत. महायुतीचे अधिकृत उमेदवार नरेंद्र दराडे यांच्या विरोधात भाजपच्याच दोन नेत्यांनी बंडखोरीचे निशाण फडकवल्याने राजकीय वर्तुळात खळबळ उडाली आहे. भाजपचे मालेगावचे बंडखोर नेते प्रसाद हिरे आणि अपक्ष उमेदवार गोकुळ गीते यांनी माघार न घेता रिंगणात कायम राहण्याचा निर्णय घेतल्यामुळे, नाशिकमध्ये आता अटीतटीचा तिरंगी सामना रंगणार हे स्पष्ट झाले आहे. या बंडखोरीमुळे महायुतीचे संकट वाढले असून, संकटमोचक मानले जाणारे मंत्री गिरीश महाजन आणि मंत्री उदय सामंत यांना हे वादळ शमवण्यात अपयश आले आहे.
"मला फडणवीस किंवा महाजनांनी माघारीची सूचना दिलेली नाही" - प्रसाद हिरे
निवडणुकीच्या या धामधुमीत भाजपचे बंडखोर नेते प्रसाद हिरे यांनी थेट भाजप कार्यालयात हजेरी लावल्याने सर्वांच्या भुवया उंचावल्या होत्या. त्यावर स्पष्टीकरण देताना हिरे म्हणाले, "हा माझा पक्ष आहे आणि हे माझे कार्यालय आहे. मी पक्षाच्या पदाधिकाऱ्यांना भेटायला आलो होतो. मी निवडणूक लढवण्यावर ठाम असून माझा विजय नक्की आहे."
पुढे बोलताना त्यांनी एक धक्कादायक खुलासा केला:
"मला माघार घेण्यासाठी मुख्यमंत्री देवेंद्र फडणवीस किंवा मंत्री गिरीश महाजन यांनी अद्याप कोणतीही सूचना दिलेली नाही. मी गिरीश महाजन यांची भेट घेणार असून, त्यानंतर ते जो काही आदेश देतील त्यावर पुढील योग्य तो निर्णय घेतला जाईल."
"उमेदवाराच्या मुलाने माझा 'बाप' काढला, आता माघार नाहीच!" - गोकुळ गीते आक्रमक
दुसरीकडे, अपक्ष उमेदवार गोकुळ गीते यांनीही माघार न घेतल्याने महायुतीला मोठा हादरा बसला आहे. मंत्री गिरीश महाजन आणि उदय सामंत हे गीते यांची मनधरणी करून त्यांचा जाहीर पाठिंबा मिळवण्याचा प्रयत्न करत आहेत. मात्र, गीतेंनी अत्यंत कडक शब्दांत सुनावले की, "जाहीर पाठिंबा देण्याचा विषयच येत नाही, निवडणूक आता खूप पुढे गेली आहे."
आपल्या उमेदवारीवर ठाम राहण्याचे अत्यंत गंभीर कारण सांगताना गोकुळ गीते म्हणाले:
अर्वाच्च भाषेत धमकी: "महायुतीचे उमेदवार नरेंद्र दराडे यांचे सुपुत्र कुणाल दराडे यांनी मला फोनवरून अर्वाच्च भाषेत धमकी दिली. समोरच्या उमेदवाराच्या मुलाने थेट माझा 'बाप' काढला, त्यामुळे आता स्वाभिमानासाठी मला ही निवडणूक लढवणे क्रमप्राप्त आहे."
नेत्यांना आवाहन: "महायुतीचे उमेदवार हे क्रियाशील नसून पूर्णपणे निष्क्रिय आहेत. या निष्क्रिय उमेदवारासाठी भाजप आणि युतीचे नेते माझ्यावर दबाव आणत आहेत. माझी नेत्यांना विनंती आहे की त्यांनी माझ्यावर कोणताही दबाव आणू नये."
गीते कुटुंबात फूट; लढत तिरंगी होणार
महायुतीमध्ये ही जागा शिवसेना शिंदे गटाला सुटल्यामुळे गोकुळ गीते यांचे बंधू आणि भाजप नेते गणेश गीते यांनी पक्षाशी एकनिष्ठ राहत आपला अर्ज मागे घेतला. मात्र, गोकुळ गीते स्वतः रिंगणात ठाम राहिले आहेत. आपला प्रचार सुरू झाला असून सर्वाधिक नगरसेवक आपल्याच पाठीशी उभे राहतील, असा ठाम विश्वास त्यांनी व्यक्त केला आहे.
त्यामुळे आता नाशिकच्या रणांगणात महायुतीचे नरेंद्र दराडे विरुद्ध गोकुळ गीते विरुद्ध प्रसाद हिरे असा थेट आणि चुरशीचा सामना रंगणार असून, या बंडखोरीचा फटका कोणाला बसणार, याकडे संपूर्ण जिल्ह्याचे लक्ष लागले आहे.
