मालेगाव, (प्रतिनिधी) ७ जून - मालेगाव शहरातून वैद्यकीय क्षेत्राला काळीमा फासणारी एक अत्यंत धक्कादायक आणि संतापजनक घटना समोर आली आहे. एका खासगी रुग्णालयात अल्पवयीन मुलीची बेकायदेशीर प्रसूती करून, जन्माला आलेल्या नवजात बाळाची परस्पर विक्री केल्याचा धक्कादायक प्रकार उघडकीस आला आहे. या गंभीर प्रकरणी मालेगाव सामान्य रुग्णालयाचे माजी वैद्यकीय अधीक्षक यांच्यासह दोन नामवंत डॉक्टर आणि एकूण ११ जणांविरोधात पोलिसांनी गुन्हा दाखल केला आहे. या घटनेमुळे संपूर्ण नाशिक जिल्हा आणि आरोग्य विभागात प्रचंड खळबळ उडाली आहे.
माजी वैद्यकीय अधीक्षकांचा समावेश
गुन्हा दाखल झालेल्या संशयितांमध्ये मालेगाव सामान्य रुग्णालयाचे तत्कालीन वैद्यकीय अधीक्षक डॉ. किशोर डांगे यांचा समावेश असल्याने या प्रकरणाचे गांभीर्य अधिक वाढले आहे. डॉ. डांगे हे कोरोना महामारीच्या अत्यंत संवेदनशील काळात मालेगाव सामान्य रुग्णालयाचे प्रमुख म्हणून कार्यरत होते. शासकीय सेवेतून निवृत्त झाल्यानंतर त्यांनी स्वतःचे खासगी रुग्णालय सुरू केले होते. सरकारी सेवेत कार्यरत असतानाही ते विविध वादांमुळे नेहमीच चर्चेत राहिले होते. आता थेट मानवी तस्करी आणि बालकांच्या खरेदी-विक्रीच्या गुन्ह्यात त्यांचे नाव आल्याने शहरात उलटसुलट चर्चा सुरू आहेत.
पॉक्सो आणि बाल तस्करीचे गंभीर गुन्हे
पोलिसांनी दिलेल्या प्राथमिक माहितीनुसार, एका पीडित अल्पवयीन मुलीची एका खाजगी रुग्णालयात गुप्तपणे आणि बेकायदेशीररीत्या प्रसूती करण्यात आली. प्रसूती झाल्यानंतर मिळालेल्या नवजात बालकाचे संगनमताने दलाल आणि डॉक्टरांच्या मदतीने आर्थिक व्यवहार करून परस्पर विक्री करण्यात आली.
या संपूर्ण रॅकेटचा पर्दाफाश झाल्यानंतर पोलीस प्रशासनाने तातडीने पावले उचलत डॉ. किशोर डांगे यांच्यासह ११ जणांविरोधात बालकांचे लैंगिक अपराधांपासून संरक्षण कायदा (पॉक्सो - POCSO), बेकायदेशीर प्रसूती करणे आणि बालकांची बेकायदेशीर खरेदी-विक्री करणे या संदर्भातील विविध कडक कलमान्वये गुन्हे दाखल केले आहेत.
आरोग्य यंत्रणेच्या सुरक्षेवर प्रश्नचिन्ह!
अटक आणि गुन्हा दाखल करण्यात आलेल्यांमध्ये वैद्यकीय क्षेत्रातील नामांकित व्यक्तींचा समावेश असल्याने संपूर्ण जिल्ह्यातील आरोग्य यंत्रणा चक्रावून गेली आहे. या प्रकरणाने अल्पवयीन मुलींचे संरक्षण, खाजगी रुग्णालयांचे बेकायदेशीर कामकाज आणि बालकांच्या हक्कांची पायमल्ली यांसारखे अनेक गंभीर प्रश्न ऐरणीवर आणले आहेत.
गुन्ह्याचे गांभीर्य लक्षात घेऊन पोलीस प्रशासनाने तपासाची चक्रे वेगाने फिरवली असून, या रॅकेटमध्ये आणखी काही डॉक्टर्स, परिचारिका किंवा मोठ्या दलालांचा समावेश आहे का? तसेच यापूर्वीही असे प्रकार घडले आहेत का? याचा सखोल तपास पोलीस करत आहेत. या तपासातून नेमके काय सत्य बाहेर येते, याकडे संपूर्ण नाशिक जिल्ह्याचे लक्ष लागले आहे.
