नाशिक, (प्रतिनिधी) ४ जून २०२६
आगामी सिंहस्थ कुंभमेळा २०२७ च्या पूर्वतयारीला गती देण्यासाठी नाशिक जिल्हा प्रशासनाने एक अत्यंत कौतुकास्पद आणि अभिनव उपक्रम राबवला आहे. त्र्यंबकेश्वर आणि नाशिक परिसरातील रस्ते, वाहतूक आणि पार्किंग व्यवस्थापनाची प्रत्यक्ष पाहणी करण्यासाठी जिल्हाधिकारी आयुष प्रसाद आणि ग्रामीण पोलीस अधीक्षक डॉ. डी. एस. स्वामी यांच्यासह वरिष्ठ अधिकाऱ्यांच्या संयुक्त पथकाने चक्क 'एसटी' बसने प्रवास करत दौरा केला. शासनाच्या इंधन बचतीच्या सूचनांचे पालन करत आणि 'कारपूलिंग'चा संदेश देत या सर्व अधिकाऱ्यांनी आपली स्वतंत्र शासकीय वाहने बाजूला ठेवून हा सामूहिक प्रवास केला.
बस प्रवासाचा 'तांत्रिक' फायदा!
या आगळ्यावेगळ्या प्रयोगामुळे केवळ इंधन आणि वेळेचीच बचत झाली नाही, तर कुंभमेळ्याच्या काळात चालवल्या जाणाऱ्या हजारो 'शटल बस'च्या दृष्टीने रस्त्यांची रुंदी, अवघड वळणे, चढ-उतार आणि उंचीची मर्यादा यांसारख्या तांत्रिक बाबींची अधिकाऱ्यांना बसमध्ये बसूनच थेट जागेवर खात्री करता आली.
विमानतळासारखा 'होल्डिंग एरिया' आणि आधुनिक सुविधा
नाशिक ग्रामीण पोलिसांनी कुंभमेळा परिसराचे ३ भागांमध्ये (सेक्टर) विभाजन केले असून, कालचा दौरा घोटी आणि नाशिक-त्र्यंबकेश्वर मार्गाच्या दक्षिण भागाचा समावेश असलेल्या 'सेक्टर १' वर केंद्रित होता.
गर्दी नियंत्रण: भाविकांची मुख्य रस्त्यांवर कोंडी होऊ नये म्हणून समृद्धी महामार्गाखाली आणि घोटी-त्र्यंबकेश्वर परिसरात विमानतळावरील नियंत्रित व्यवस्थेप्रमाणे आधुनिक 'होल्डिंग एरिया' (थांबण्याची ठिकाणे) तयार केले जाणार आहेत.
हायटेक सुविधा: या होल्डिंग एरियामध्ये भाविकांसाठी स्वच्छतागृहे, पाणी, वीज, सार्वजनिक सूचना प्रणालीसोबतच ई-वाहनांसाठी 'ईव्ही चार्जिंग स्टेशन' देखील उभारले जाईल.
'व्हॅलेट पार्किंग' आणि शटल बस सेवा
भाविकांच्या सोयीसाठी मुख्य पार्किंग क्षेत्रांमधून स्वतंत्र 'शटल बस सेवा' चालविली जाईल. यासाठी तात्पुरते बस डेपो आणि चालकांसाठी विश्रांतीगृहे उभारली जातील. वाहतूक सतत चालू राहण्यासाठी प्रमुख चौकांचे (जंक्शन्स) नवीन नियोजन करून अंतर्गत रस्ते एकमार्गी (One Way) केले जातील. विशेष म्हणजे, पार्किंग व्यवस्थेत ‘व्हॅलेट पार्किंग’ सारख्या आधुनिक सुविधेचा समावेश करण्याचा प्रशासनाचा विचार आहे.
सिंहस्थ नियोजनात तृतीयपंथीयांना रोजगाराची संधी!
यावेळच्या सिंहस्थ कुंभमेळ्याच्या नियोजनात जिल्हा प्रशासनाने 'सामाजिक समावेशकतेवर' (Social Inclusivity) विशेष भर दिला आहे. समाजातील प्रत्येक घटकाला मुख्य प्रवाहात सहभागी करून घेण्यासाठी, विशेषतः तृतीयपंथी (Transgender) व्यक्तींना कुंभमेळा व्यवस्थेमध्ये रोजगाराच्या दर्जेदार संधी उपलब्ध करून देण्याबाबत प्रशासन सकारात्मक विचार करत आहे.
अंतिम आराखडा प्राधिकरणाकडे जाणार
या दौऱ्याच्या आधारे सार्वजनिक बांधकाम विभाग, पोलीस आणि संबंधित यंत्रणांकडून 'सेक्टर क्रमांक १' चा सविस्तर आराखडा तयार केला जात आहे. जिल्हास्तरीय आढावा बैठकीनंतर हा अंतिम आराखडा आणि निधीची मागणी मंजुरीसाठी 'सिंहस्थ कुंभमेळा प्राधिकरणाकडे' सादर केली जाईल. या दौऱ्यात कार्यकारी अभियंता नवनाथ सोनवणे आणि एसटीचे विभागीय वाहतूक अधिकारी किरण भोसले आदी उपस्थित होते.