नाशिक, (प्रतिनिधी) ४ जून - शहर आणि परिसरात आत्महत्येचे सत्र थांबण्याचे नाव घेत नसून, बुधवारी (३ जून) वेगवेगळ्या भागात राहणाऱ्या दोन तरुणांनी गळफास लावून घेत आपली जीवनयात्रा संपवली. दोन्ही घटनांमध्ये आत्महत्येचे नेमके कारण समजू शकलेले नाही. याप्रकरणी पंचवटी आणि एमआयडीसी अंबड पोलीस ठाण्यात आकस्मिक मृत्यूच्या नोंदी करण्यात आल्या आहेत.
पहिली घटना: फुलेनगर, पंचवटी
पोलिसांनी दिलेल्या माहितीनुसार, वैभव दिलीप गांगुर्डे (वय २०, रा. फुलेनगर, पंचवटी) या तरुणाने बुधवारी दुपारच्या सुमारास अज्ञात कारणातून आपल्या राहत्या पत्र्याच्या शेडमध्ये अंघोळीच्या जागेत साडीने गळफास लावून घेतला. हा प्रकार निदर्शनास येताच तानाजी भोईर यांनी शेजाऱ्यांच्या मदतीने वैभवला तात्काळ जिल्हा रुग्णालयात दाखल केले. मात्र, वैद्यकीय सूत्रांनी तपासून त्यास दाखलपूर्व मृत घोषित केले. याप्रकरणी पंचवटी पोलीस ठाण्यात मृत्यूची नोंद करण्यात आली असून पोलीस हवालदार कुलकर्णी पुढील तपास करत आहेत.
दुसरी घटना: चुंचाळे शिवार, दत्तनगर
दुसरी घटना चुंचाळे शिवारातील कारगील चौक परिसरात घडली. येथील नवनाथ महादू बोरसे (वय ३४, रा. दत्तनगर) यांनी बुधवारी सायंकाळी अज्ञात कारणातून आपल्या राहत्या घरातील हॉलमध्ये छताच्या पंख्याला दोरी बांधून गळफास घेतला. कुटुंबीयांनी हा प्रकार पाहिल्यानंतर त्यांना तातडीने खाली उतरवून जिल्हा रुग्णालयात उपचारासाठी दाखल केले. परंतु, डॉक्टरांनी त्यांना तपासून मृत घोषित केले. याप्रकरणी एमआयडीसी पोलीस ठाण्यात आकस्मिक मृत्यूची नोंद करण्यात आली असून पोलीस हवालदार चव्हाण तपास करत आहेत.
