नाशिक, (प्रतिनिधी) ५ जानेवारी २०२६ - शहरातील तपोवन परिसरातील वृक्षतोडीबाबत पुण्यातील हरित न्यायालयात आज सुनावणी झाली. त्यात नाशिक शहरासह जिल्हा प्रशासनाला ऍडव्होकेट श्री. श्रीराम पिंगळे यांचा हरित लवादाच्या माध्यमातून आणखी एक धक्का मिळाला आहे. संपूर्ण नाशिक जिल्ह्यात वृक्षतोडीस आज अंतरिम स्थगिती देण्यात आली आहे.
पुणे यथील मा. हरित लवादाने नाशिक जिल्हा प्रशासनाला धक्का देत संपूर्ण नाशिक जिल्ह्यात वृक्षतोडीस स्थगितीचे आदेश दिले आहेत. वाढिवरे ते समृद्धी महामार्गावर दिनांक १९ डिसेंबर रोजी २०० वर्ष जुन्या वडाच्या झाडांची कत्तल सुरु असल्याची माहिती मिळताच अर्जदार श्रीमती अश्विनी सुनील भट राहणार नाशिक यांनी तातडीने त्या ठिकाणी जाऊन बेकायदा वृक्षतोड थांबविण्याचा प्रयत्न केला. सार्वजनिक बांधकाम विभागाच्या वृक्षतोड करणाऱ्या कर्मचाऱ्यांना वृक्ष तोडण्यासाठी परवानगी दाखवा असे विचारले असता, त्यांनी १९ ऑगस्ट रोजीचे अपघात ग्रस्त वृक्ष व फांद्या तोडीस फक्त ३० दिवसांची मुदतवाढ देणारे पत्र दाखवले.
सदरचे पत्र १८ सप्टेंबर रोजी कालबाह्य झाले असल्याने १९ डिसेंबर रोजी त्यांना वृक्ष तोडण्याचा अधिकार नव्हता असे लक्षात आणून दिल्यावर कर्मचार्यानी तिथून पळ काढला. श्रीमती भट यांनी सुमारे १:३० मिनिटे दुपारी सर्वोच्च न्यायालयाचे ऍडव्होकेट श्री. श्रीराम पिंगळे यांना संपर्क करून सर्व हकीकत सांगितले व उपलब्ध फोटो व दस्त पाठवले. ऍडव्होकेट श्री. श्रीराम पिंगळे यांनी त्वरित म्हणजे त्याच दिवशी ५ वाजता हरित लवाद पुणे येथे सार्वजनिक बांधकाम विभाग, विभागीय वन अधिकारी नाशिक , महाराष्ट्र शासन, मुख्य वन संरक्षक व महाराष्ट्र राज्य वृक्ष प्राधिकरण यांच्या विरुद्ध मूळ अर्ज दाखल केला.
नाताळच्या सुट्ट्यामुळे त्यावर आज सुनावणी झाली. दरम्यान च्या काळा मध्ये २९ डिसेंबर रोजी त्याच परिसरात पुन्हा एकदा वृक्ष तोडीचा प्रयत्न झाल्याचे सजग नागरिकांनी अर्जदार यांच्या लक्षात आणून देताच श्री. गौरव देशमुख तसेच श्री. रोहन देशपांडे व त्यांच्या टीम ने त्या ठिकाणी जाऊन वृक्षतोड थांबवली. आज रोजी मा. हरित लवादाने अंतरिम आदेश पारित करताना संपूर्ण नाशिक जिल्ह्यामध्ये संपूर्ण कायदेशीर प्रक्रिया राबवून वृक्ष तोडीचा परवाना मिळाल्याशिवाय एकही झाड तोडू नये असे आदेश दिले. तसेच सर्व जाबदेणार याना आपले म्हणणे सादर करण्यास सांगितले आहे.
यापूर्वी पारित केलेले अंतरिम आदेश हे नाशिक महानगर पालिका क्षेत्रासाठी होते आ रोजी पारित केलेला आदेश उर्वरित संपूर्ण जिल्ह्यासाठी आहे. या मध्ये सजग नाशिककरानी वृक्ष तोडीची वेळोवेळी माहिती देऊन मोलाचे योगदान दिले. या कामी ऍडव्होकेट श्री. श्रीराम पिंगळे यांना त्यांचे सहकारी ऍडव्होकेट श्री. विकास अगरवाल यांनी सहाय्यक म्हणून मदतीचे काम केले.