नाशिक, (विशेष प्रतिनिधी) ११ मे - नाशिक महानगरपालिकेच्या सक्षम नियोजनाला आणि दूरदृष्टीपूर्ण नेतृत्वामुळे केंद्र शासनाच्या 'अर्बन चॅलेंज फंड (UCF) २०२६' अंतर्गत नाशिकच्या महत्त्वपूर्ण विकास प्रकल्पांना मंजुरी मिळाली आहे. या योजनेअंतर्गत नाशिकला सुमारे ₹२७२.२२ कोटींचे केंद्र सहाय्य मिळणार असून शहराच्या पायाभूत सुविधांच्या विकासाला यामुळे नवी गती मिळणार आहे.
शहराच्या सक्षम प्रशासनावर आणि विकास आराखड्यावर विश्वास ठेवून राष्ट्रीय स्तरावरील या प्रक्रियेत नाशिकची निवड करण्यात आली आहे. सुमारे ₹१,१०० कोटींच्या एकूण विकास प्रकल्पांपैकी २५ टक्के निधी हा केंद्र सरकारकडून अनुदान म्हणून प्राप्त होणार आहे.
या महत्त्वाच्या प्रकल्पांना मिळाली मंजुरी
राष्ट्रीय शिखर समितीने नाशिकच्या विविध क्षेत्रांतील प्रस्तावांवर मोहोर उमटवली आहे:
पाणी व स्वच्छता: नवीन जलशुद्धीकरण केंद्र आणि संबंधित कामे.
स्वच्छ गोदावरी मोहीम: गोदावरी नदीच्या संवर्धनासाठी विशेष उपक्रम.
ऊर्जा निर्मिती: बायो-मेथनेशनसह वीज निर्मिती प्रकल्प आणि पूरक पायाभूत सुविधांचा विकास.
जुने नाशिक पुनर्विकास: राम कुंड (रामकाल) पथ पुनर्विकास योजनेचा दुसरा टप्पा.
निर्मल नाशिक (NIRMAL): रस्ते गतिशीलता वाढवणे, लॉजिस्टिक सुधारणा आणि स्मार्ट पार्किंग व्यवस्था.
कुंभमेळा २०२७ साठी नाशिक होणार 'फ्युचर रेडी'
या निधीमुळे पाणीपुरवठा, मलनिस्सारण विस्तार, नागरी गतिशीलता आणि पर्यावरणीय शाश्वततेमध्ये लक्षणीय सुधारणा होईल. विशेषतः २०२७ मध्ये होणाऱ्या कुंभमेळ्यासाठी नाशिक शहर अधिक सुसज्ज होण्यास या प्रकल्पांची मोठी मदत होणार आहे. नाशिक आता देशपातळीवर एक 'भविष्यसज्ज शहर' (Future-Ready and Resilient City) म्हणून नावारूपास येत आहे.
आर्थिक नियोजनाचा आदर्श
महानगरपालिकेने यापूर्वी ₹४०० कोटींचे म्युनिसिपल बाँड्स यशस्वीपणे उभारून आर्थिक शिस्त आणि सक्षम वित्तीय नियोजनाचा आदर्श निर्माण केला होता. याच भक्कम तयारीचा उपयोग अर्बन चॅलेंज फंड मिळवण्यासाठी झाला आहे.
"अर्बन चॅलेंज फंड अंतर्गत मिळालेली मंजुरी ही नाशिककरांसाठी अभिमानाची बाब आहे. नियोजनबद्ध प्रयत्न, आर्थिक शिस्त आणि टीमवर्कमुळे हे यश मिळाले आहे. या निधीतून नाशिकला अधिक सक्षम, स्वच्छ आणि सुंदर शहर बनविण्याचा आमचा संकल्प आहे."
— मनीषा खत्री, आयुक्त, नाशिक मनपा
प्रकल्पांची आकडेवारी एका नजरेत (कोटीमध्ये):
प्रकल्पाचे नाव एकूण खर्च UCF हिस्सा (केंद्र)
जलशुद्धीकरण केंद्र ₹४००.०० ₹१००.००
स्वच्छ गोदावरी मोहीम ₹२२५.०० ₹५६.२५
राम कुंड मार्ग पुनर्विकास ₹६२.५१ ₹१५.६३
स्मार्ट आणि इंटेलिजेंट रस्ते ₹२०५.०० ₹५१.२५
एकूण ₹१०८८.८८ ₹२७२.२२