नाशिक, (प्रतिनिधी) २९ एप्रिल - हळदीच्या कार्यक्रमात मोबाईलमध्ये सेल्फी काढण्यात मग्न असणे एका महिलेला चांगलेच महागात पडले आहे. मुलीसोबत सेल्फी घेत असताना दुचाकीला टांगलेली पर्स चोरट्यांनी लंपास केली. या पर्समध्ये सुमारे ३ लाख १० हजार रुपयांचे सोन्याचे अलंकार होते. ही घटना पेठरोडवरील राऊ हॉटेल परिसरातील एका लॉन्समध्ये घडली.
याप्रकरणी सुनीता गोरखनाथ खुळे (रा. मातोश्री नगर, मखमलाबाद) यांनी म्हसरूळ पोलीस ठाण्यात फिर्याद दिली आहे. खुळे या मंगळवारी (दि. २८) रात्री त्यांच्या शेजारी राहणाऱ्या मुलीच्या हळदीच्या कार्यक्रमासाठी पेठरोड भागातील 'पॅराडाईज लॉन्स'मध्ये गेल्या होत्या.
नेमकी घटना काय?
लॉन्समध्ये सर्वत्र फोटो सेशन आणि आनंदाचे वातावरण होते. रात्रीच्या सुमारास खुळे या आपल्या मुलींसोबत लॉन्सच्या पार्किंग भागात मोबाईलवर सेल्फी काढत होत्या. यावेळी त्यांनी आपल्या ताब्यातील ॲक्टिव्हा दुचाकीच्या हँडलला दागिने असलेली पर्स टांगली होती. सेल्फी काढण्याच्या उत्साहात त्यांचे पर्सकडे दुर्लक्ष झाले. काही वेळाने त्या मुलींना घेऊन घरी परतल्या. घरी पोहोचल्यानंतर आपली पर्स दुचाकीलाच विसरल्याचे त्यांच्या लक्षात आले.
दागिन्यांवर सोडावे लागले पाणी
सुनीता खुळे यांनी तातडीने पुन्हा लॉन्स गाठले आणि पार्किंग भागात शोध घेतला, मात्र तोपर्यंत चोरट्यांनी पर्सवर डल्ला मारला होता. या पर्समध्ये:
राणी हार
मनीमंगळसूत्र
कानातले वेल असलेले चार जोड
दोन शॉर्ट पोत
असा एकूण ३ लाख १० हजार ४६५ रुपयांचा ऐवज होता. या घटनेमुळे परिसरात खळबळ माजली असून म्हसरूळ पोलीस ठाण्याचे हवालदार सतीश वसावे याप्रकरणी अधिक तपास करत आहेत.
सावधान!
सार्वजनिक कार्यक्रम किंवा गर्दीच्या ठिकाणी फोटो आणि सेल्फी काढताना आपल्या मौल्यवान वस्तूंकडे दुर्लक्ष करू नका. चोरटे अशाच संधीच्या शोधात असतात, असे आवाहन पोलिसांनी केले आहे.