नाशिक, (प्रतिनिधी) १९ एप्रिल - सिंहस्थ कुंभमेळ्याच्या पार्श्वभूमीवर शहरात सुरू असलेली विकासकामे नाशिककरांच्या संयमाची परीक्षा पाहत आहेत. गेल्या अनेक महिन्यांपासून सुरू असलेल्या द्वारका भुयारी मार्गाच्या कामाला आता पुन्हा तीन महिन्यांची मुदतवाढ देण्यात आली आहे. शहर वाहतूक शाखेने यासंदर्भातील अधिसूचना जारी केली असून, यामुळे पुढील ९० दिवस नाशिककरांना पर्यायी मार्गांचा अवलंब करावा लागणार आहे. द्वारका परिसरातील वाहतूक सुरळीत करण्यासाठी सुरू असलेल्या या कामामुळे परिसरातील वाहतूक विस्कळीत झाली आहे.
कामाची व्याप्ती आणि प्रगती पाहता वाहतूक पोलिसांनी ही मुदतवाढ मान्य केली आहे. मात्र, यामुळे सिटीलिंक आणि एसटी बसच्या वेळापत्रकावर मोठा परिणाम झाला असून प्रवाशांना आता नवीन मार्गांचा अभ्यास करूनच घराबाहेर पडावे लागणार आहे.
सिटीलिंक आणि एसटी बससाठी नवा 'रूट'
प्रवाशांची गैरसोय टाळण्यासाठी प्रशासनाने बस सेवेसाठी स्वतंत्र मार्ग निश्चित केले आहेत. आता सर्व सिटीलिंक बसेस तपोवन बस टर्मिनल येथून सुटणार आहेत.
१. शालिमार ते नाशिक रोड (जाताना):
शालिमार - खडकाळी सिग्नल - सारडा सर्कल - नॅशनल उर्दू शाळा - मदिना चौक - हॉटेल कोर्टयार्ड (डावीकडून) - वडाळा नाका- नागजी सिग्नल - अशोका सिग्नल - फेम सिग्नल - नाशिक रोड.
२. नाशिक रोड ते शालिमार (येताना):
नाशिक रोड - फेम सिग्नल - अशोका सिग्नल - भारत नगर - नागजी सिग्नल - वडाळा नाका - बॉम्बे नाका सर्कल - मदिना चौक - नॅशनल उर्दू शाळा - सारडा सर्कल - शालिमार.
अवजड वाहनांना वेळेचे बंधन
भुयारी मार्गाच्या कामामुळे होणारी गर्दी टाळण्यासाठी अवजड वाहनांच्या प्रवेशावरही निर्बंध घालण्यात आले आहेत. अवजड वाहनांना प्रशासनाने ठरवून दिलेल्या विशिष्ट वेळेतच शहरात प्रवेश मिळेल. नियमांचे उल्लंघन करणाऱ्या वाहनांवर कडक कारवाईचा इशारा वाहतूक शाखेने दिला आहे.
"नाशिककरांनी पुढील तीन महिने बसचे नवीन वेळापत्रक पाहूनच प्रवासाचे नियोजन करावे. पर्यायी मार्गांवर वाहतुकीचा ताण वाढण्याची शक्यता असल्याने वाहनधारकांनी सहकार्य करावे."
— वाहतूक शाखा, नाशिक पोलीस