नाशिक, (प्रतिनिधी) १२ फेब्रुवारी - शहरात गेल्या काही दिवसांपासून धुमाकूळ घालणाऱ्या परप्रांतीय चोरट्यांच्या दुकलीला जेरबंद करण्यात शहर गुन्हे शाखेच्या युनिट २ ला यश आले आहे. चुंचाळे शिवारात लावलेल्या सापळ्यात हे दोन्ही भामटे अडकले असून, त्यांच्या अटकेमुळे चैन स्नॅचिंग आणि दुचाकी चोरीच्या तब्बल ११ गुन्ह्यांचा उलगडा झाला आहे.
उत्तरप्रदेशातील 'रेकॉर्डवरील' गुन्हेगार गजाआड
अटक करण्यात आलेल्या संशयितांची नावे शुभम विनोदकुमार मौर्या (२५) आणि संदेश उर्फ शिलू रमाशंकर मौर्या (२५) (दोघेही मूळ रा. उत्तरप्रदेश, सध्या रा. अंबड-लिंक रोड) अशी आहेत. यातील शिलू मौर्या हा सराईत गुन्हेगार असून त्याच्यावर उत्तरप्रदेशातही चोरी आणि घरफोडीचे गंभीर गुन्हे दाखल आहेत.
असा लागला छडा: १५० सीसीटीव्ही अन् गुप्त माहिती
गेल्या रविवारी आणि सोमवारी अंबड व गंगापूर परिसरात चैन स्नॅचिंगच्या घटना घडल्या होत्या. दोन्ही गुन्ह्यांची पद्धत (Modus Operandi) सारखीच असल्याने पोलीस सतर्क झाले. युनिट २ च्या पथकाने परिसरातील तब्बल १५० हून अधिक सीसीटीव्ही फुटेज तपासले. दरम्यान, सहाय्यक निरीक्षक डॉ. समाधान हिरे आणि हवालदार प्रकाश महाजन यांना माहिती मिळाली की, हे चोरटे चोरीचे दागिने विकण्यासाठी एक्स्लो पॉईंट परिसरात येणार आहेत. या माहितीच्या आधारे पांजरापोळच्या भिंतीजवळ सापळा लावून दोघांना ताब्यात घेण्यात आले.
पाच लाखांचा मुद्देमाल हस्तगत
पोलिसांनी या कारवाईत खालील मुद्देमाल जप्त केला आहे:
सोन्याचे दागिने: जबरी चोरीतील दोन तुटलेल्या सोन्याच्या पोती.
वाहने व मोबाईल: चोरीच्या पैशातून खरेदी केलेली दुचाकी आणि महागडा मोबाईल.
एकूण किंमत: ५ लाख १४ हजार रुपये.
कोणत्या भागातील गुन्हे उघड झाले?
संशयितांनी दिलेल्या कबुलीनुसार खालील ११ गुन्ह्यांची उकल झाली आहे:
इंदिरानगर: ५ गुन्हे
गंगापूर: ३ गुन्हे
अंबड, सातपूर, सरकारवाडा: प्रत्येकी १ गुन्हा
या पथकाने बजावली कामगिरी
गुन्हे शाखेचे प्रभारी हेमंत तोडकर यांच्या मार्गदर्शनाखाली सहाय्यक निरीक्षक डॉ. समाधान हिरे, जमादार शंकर काळे, संजय सानप, बाळी शेळके, भारती देवकर, नंदकुमार नांदुर्डीकर, प्रकाश महाजन आणि त्यांच्या सहकाऱ्यांनी ही यशस्वी कारवाई केली. संशयितांना पुढील तपासासाठी अंबड पोलिसांच्या स्वाधीन करण्यात आले आहे.
नागरिकांनी अनोळखी व्यक्तींकडून दागिने विकत घेऊ नयेत आणि संशयास्पद हालचाली दिसल्यास तातडीने पोलिसांना कळवावे.
'सुपरफास्ट नाशिक'चे मुख्य संपादक, ज्येष्ठ पत्रकार आणि लेखक भावेश ब्राह्मणकर यांचे 'अरुणोदय' पुस्तक प्रकाशन पूर्व बुकिंगसाठी उपलब्ध झाले आहे.
प्रथितयश दिलीपराज प्रकाशनाने २५ टक्के घसघशीत सूट त्यासाठी दिली आहे.
पुस्तक बुकिंगसाठी खालील लिंकवर क्लिक करावे
https://www.diliprajprakashan.in/products/arunoday-by-bhavesh-brahmankar
