नाशिक, (विशेष प्रतिनिधी) १२ जानेवारी - नाशिक महानगरपालिका निवडणुकीच्या (२०२६) रिंगणात महायुतीमधील पेच सोडवण्यासाठी राष्ट्रवादी काँग्रेसने मोठे पाऊल उचलले आहे. ज्या जागांवर राष्ट्रवादी काँग्रेस आणि शिवसेना या दोन्ही पक्षांचे उमेदवार समोरासमोर आले होते, तिथे युतीचे नुकसान टाळण्यासाठी राष्ट्रवादी काँग्रेसने आपल्या उमेदवारांची उमेदवारी मागे घेत शिवसेनेच्या उमेदवारांना जाहीर पाठिंबा घोषित केला आहे.
राष्ट्रवादी काँग्रेसचे प्रदेशाध्यक्ष खा. सुनील तटकरे यांनी यासंदर्भातील अधिकृत पत्र प्रसिद्ध करून पक्षाच्या कार्यकर्त्यांना आणि संबंधित उमेदवारांना युती धर्माचे पालन करण्याचे आदेश दिले आहेत.
या प्रभागांमध्ये राष्ट्रवादीने घेतली माघार
नाशिक महानगरपालिकेच्या चार महत्त्वाच्या प्रभागांमध्ये दोन्ही पक्षांनी उमेदवार उभे केले होते. मात्र, आता राष्ट्रवादीने खालीलप्रमाणे शिवसेनेच्या उमेदवारांना समर्थन दिले आहे:
| प्रभाग क्र. | राष्ट्रवादीचे उमेदवार (ज्यांनी माघार घेतली) | शिवसेनेचे उमेदवार (ज्यांना पाठिंबा दिला) |
| १ (अ) | वंदना गणेश पेल्महाले | उर्मिला सुनील निरगुडे |
| ११ (अ) | विजय अशोक अहिरे | योगेश रामदास गांगुर्डे |
| ११ (ड) | जीवन जगदीश रायते | धिरज अशोक शेळके |
| १३ (क) | शेखर शिवाजीराव देवरे | दीपक रंगनाथ डोके |
युतीचे नुकसान टाळण्यासाठी निर्णय
"नाशिक महानगरपालिका निवडणुकीसाठी राष्ट्रवादी काँग्रेस आणि शिवसेना यांच्यात युती झालेली आहे. मात्र, काही जागांवर दोन्ही पक्षांचे उमेदवार आमने-सामने आल्याने युतीचे नुकसान होण्याची शक्यता होती. हे टाळण्यासाठी राष्ट्रवादी काँग्रेसने आपल्या उमेदवारांशी चर्चा करून शिवसेनेच्या उमेदवारांना पाठिंबा देण्याचा निर्णय घेतला आहे," असे खा. सुनील तटकरे यांनी पत्रात नमूद केले आहे.
या निर्णयामुळे नाशिकमधील राजकीय समीकरणे बदलण्याची शक्यता असून, युतीमधील समन्वय वाढल्याचे चित्र दिसत आहे. राष्ट्रवादीच्या या निर्णयामुळे शिवसेनेच्या संबंधित उमेदवारांना मोठं बळ मिळालं आहे.